واقعہ کربلا ہمیں ظلم و جبر اور باطل کے مقابل کھڑا ہونے کا درس دیتا ہے۔ڈاکٹر حمیرا طارق

سکریٹری جنرل حلقہ خواتین جماعت اسلامی پاکستان ڈاکٹر حمیرا طارق کا عاشورہ محرم الحرام کے حوالے سے خصوصی پیغام

سیکریٹری جنرل حلقہ خواتین جماعت اسلامی  پاکستان ڈاکٹر حمیرا طارق نے 10 محرم الحرام یوم عاشورہ کے موقع پر اپنے بیان میں کہا ہے کہ واقعہ کربلا تاریخِ انسانی کا ایک روشن مینار ہے، جو ہمیں ظلم، جبر اور باطل کے مقابلے میں ڈٹ جانے کا پیغام دیتا ہے۔ امام حسینؓ کی شہادت صرف ایک واقعہ نہیں بلکہ حق و باطل کے درمیان دائمی معرکے کا استعارہ ہے۔ انہوں نےکہا کہ کربلا کا پیغام آج بھی زندہ ہے، اور ہمیں یہ یاد دلاتا ہے کہ جب باطل نظام غالب ہو، جب ظلم کو قانون بنا دیا جائے اور جب حق کو دبایا جائے، تو خاموشی جرم بن جاتی ہے۔ آج عالم اسلام بالخصوص فلسطین، کشمیر ، ایران، اور دنیا بھر کے مظلوم مسلمانوں پر ہونے والے مظالم اسی جذبۂ حسینی سےجواب مانگتے ہیں۔ ڈاکٹر حمیرا طارق نے مذید کہا کہ آج جب اسرائیل جیسے طاقتور دشمن، امریکہ کی پشت پناہی سے دنیا بھر میں ظلم و جبر کا بازار گرم کیے ہوئے ہیں، تو ہمیں امام حسینؓ کے جذبہ شہادت کو یاد رکھنا چاہئیے۔ انہوں نےکہا کہ واقعہ کربلا ہمیں یہ سبق دیتا ہے کہ حق کے لیے کھڑے ہونے والا گروہ اگرچہ قلیل ہو، لیکن اللہ کی مدد اس کے ساتھ ہوتی ہے۔ اسی جذبے سے ہمیں ظلم کے خلاف اپنی آواز بلند کرنی ہے، متحد ہونا ہے اور مظلوموں کا ساتھ دینا ہے۔ڈاکٹر حمیرا طارق نے کہا کہ اگر بحیثیت مسلمان امت ہمیں سر اٹھا کر جینا ہے تو واقعہ کربلا کی حقیقی روح اور فلسفے کو سمجھتے ہوئے نقش امام حسین رضی اللہ تعالی عنہ کی پیروی لازم ہے