October 22nd, 2021 (1443ربيع الأول16)

نوجوان نظریہ پاکستان اور اسلام کا ہراول دستہ ہیں ;رخشندہ منیب

  جماعت اسلامی حلقہ خواتین سندھ کی ناظمہ رخشندہ منیب نے کہا ہے کہ اسلام دشمن قوتوں کا اصل ہدف مسلمان نوجوان ہیں ،جس کو میڈیا کے ذریعے نظریہ پاکستان اور نظریہ اسلام سے دور کیا جا رہا ہے اور اسلام کے حوالے سے شکوک وشبہات پیدا کیے جا رہے ہیں۔ ان خیالات کااظہار انہوں نے قبا آڈیٹوریم میں ہونے والی شعبہ نشرواشاعت اور شعبہ نوجوان کی ایک روزہ تربیت گاہ سے خطاب کے دوران کیا۔ رخشندہ منیب نے مزید کہا کہ موجودہ دور فتنوں کا دور ہے بعض پرنٹ میڈیا،الیکٹرونک میڈیا نسل نو میں فحاشی و بے حیائی کو فروغ دے کر قوم کے مستقبل کو بگاڑ رہا ہے، ان حالات میں صالح اجتماعیت امید کی کرن ہے، جذبوں کو مہمیز دینے والے ان صالح نسل کا عمل امید کا پیغام ہے۔ضرور ت اس امر کی ہے علم و آگہی کو اپنی قوت بناتے ہوئے ہردن حدیث اور حالات حاضرہ سے باخبر ہوجائیں۔ علاوہ ازیں تربیت گاہ سے نگران میڈیا سیل پاکستان عالیہ منصور نے بھی خطاب کیا اور ابلاغ کی اہمیت بیان کرتے ہوکہاکہ حالات حاضرہ سے درست واقفیت اور با خبر رہنا بروقت رد عمل دینا تیز رفتار دور کا تقا ضا ہے۔قبل ازیں مرکزی نگران نشرواشاعت صائمہ افتخار نے شرکا کو خبر نگاری کے اہم نکات سمجھائے اور عملی سرگرمی بھی کرائی۔ صوبائی نگران عالیہ شمیم نے شعبہ نشرو اشاعت کی اہمیت اور میدان عمل پر سیر حاصل پریزنٹیشن دی۔طہورہ شعیب نے خطوط و مراسلہ نگاری کا عملی مشق کے ذریعے درست طریقہ کار سکھایا ۔آخرمیں بہترین خبر اور مراسلہ لکھنے والوں کی حوصلہ افزائی پر خصوصی انعام دیے گئے۔