عظیم الشان غزہ مارچ میں خواتین کی بھرپور شرکت پر ڈاکٹر حمیرا طارق کا اظہار تشکر
کراچی اور لاہور کے نظم و کارکنان کی انتھک محنت پر خراج تحسین
امیر جماعت اسلامی پاکستان حافظ نعیم الرحمن کی قیادت میں آج کراچی اور گذشتہ روز لاہور میں مظلوم فلسطینی عوام سے اظہار یکجہتی کے لیے عظیم الشان غزہ مارچ کا انعقاد کیا گیا ۔ جس میں اہلیان کراچی اور لاہور جوش و خروش سے شریک تھے ، دونوں شہروں کے طول وعرض سے بڑی تعداد میں خواتین ، طالبات ،بچوں اور ہر شعبہ ہائے زندگی سے وابستہ افراد نے شرکت کی-
حلقہ خواتین جماعت اسلامی پاکستان کی سیکرٹری جنرل ڈاکٹر حمیرا طارق نے غزہ مارچ میں خواتین اور بچوں کی بڑی تعداد کی شرکت پر اظہار تشکر کرتے ہوئے کہا کہ جماعت اسلامی قبلہ اول کی آزادی اور فلسطین سے ظالم اسرائیل کے انخلا تک احتجاج جاری رکھے گی ۔ ہماری ہر سرگرمی اہل غزہ کے نام ہے۔بیت المقدس امت مسلمہ کی امیدوں کا مرکز ہے۔اسرائیل کا جنگی جنون مسلمان امت کے خون کا پیاسا ہے-امت کی بیداری اور دشمن کے خلاف صف بندی میں ہی امت مسلمہ کی بقا ہے-
ڈاکٹر حمیرا طارق نے مارچ کی کامیابی میں کراچی اور لاہور کے نظم اور کارکنان کی انتھک محنت پر خراج تحسین پیش کیا اور عوام سے اپیل کی کہ فلسطین کی اخلاقی و مالی مدد اور اسرائیلی مصنوعات کے بائیکاٹ کی مہم جاری رکھیں ۔انہوں نے کہا کہ
مزاحمت کے قائدین سے کیے گئے معاہدے کی خلاف ورزی کے بعد اسرائیل نے غزہ اور رفح میں صہیونی افواج اندھادھند بمباری جاری رکھے ہوئے ہے جس میں بڑی تعداد میں معصوم فلسطینی عوام جن میں بچے اور خواتین بھی شامل ہیں شہید ہو گئے۔ انھوں نے کہا کہ مسلمان حکمران اور خصوصی طور پر پاکستان کے حکمران اس ظلم و سفاکیت پر خاموش ہیں۔ جماعت اسلامی پاکستان نے مسلمان حکمرانوں کو بیدار کرنے کے لیے کراچی اور لاہور میں غزہ ملین مارچ کا انعقاد کیا جس میں تا حد نگاہ مرد ، خواتین اور بچے دکھائ دئیے-
علاوہ ازیں لاہور ملین مارچ میں ڈپٹی سیکرٹری ثمینہ سعید ، ڈاکٹر سمیحہ راحیل قاضی ، زبیدہ جبیں جبکہ کراچی ملین مارچ میں ڈپٹی سیکرٹری طیبہ عاطف ، عطیہ نثار اور ڈائریکٹر تعلقات عامہ دردانہ صدیقی سمیت مرکزی ذمہ داران نے شرکت کی
