کوئٹہ میں اقلیتی برادری کے ساتھ حلقہ  خواتین جماعت اسلامی کی خصوصی نشست

حلقہ خواتین جماعت اسلامی پاکستان کے تحت کوئٹہ میں اقلیتی برادری کے ساتھ ایک خصوصی پروگرام کا انعقاد کیا گیا جس میں حلقہ خواتین جماعت اسلامی کی جانب سے اقلیتی برادری کے ساتھ اظہارِ یکجہتی کیا گیا۔ پروگرام میں جماعت اسلامی حلقہ خواتین کی اقلیتی برادری کی رہنما لبنی فرانس اسحاق، جماعت اسلامی پاکستان حلقہ خواتین کی سیکرٹری جنرل ڈاکٹر حمیرا طارق، ڈپٹی سیکرٹری و ڈائریکٹر میڈیا سیل ثمینہ سعید، شازیہ عبداللہ، اسما قاضی، اور نبیلہ حمید منصوری اور اقلیتی برادری کی سسٹر ناصرہ و دیگر خواتین نے شرکت کی۔ اس موقع پر رہنماؤں نے مسیحی برادری کے لیے نیک خواہشات کا اظہار کرتے ہوئے کہا کہ:

 "پاکستان کی اقلیتی برادری ہمارے معاشرے کا اہم اور قابلِ احترام حصہ ہے۔ جماعت اسلامی کا پیغام ہمیشہ محبت، یگانگت اور قومی یکجہتی کا رہا ہے۔ ہم وطن عزیز  پاکستان میں ہر مذہب اور عقیدے کے ماننے والوں کو یکساں عزت اور حقوق فراہم کرنے کے حامی ہیں۔"

خواتین رہنماؤں نے اس بات پر اتفاق کیا کہ ملکی ترقی، امن اور استحکام کے لیے تمام مذاہب کے ماننے والوں کو مل کر مثبت کردار ادا کرنا ہو گا۔اور جماعت اسلامی کی خدمت خلق کے کاموں میں اقلیتی برادری کے نمائندگان دل جمعی سے حصہ لیتے رہے ہیں اور افرادی اور مالی تعاون پیش کرتے رہے ہیں -

پروگرام کے اختتام پر باہمی احترام، سماجی ہم آہنگی، اور قومی یکجہتی کے فروغ کے لیے دعا بھی کی گئی۔