October 19th, 2018 (1440صفر9)

تلاوت قرآن تطہیر کا وسیلہ اور اصلاح نفس کا ذریعہ ہے‘ دردانہ صدیقی

جماعت اسلامی حلقہ خواتین کی سیکرٹری جنرل دردانہ صدیقی نے کہا ہے کہ قرآن مجید وہ عظیم کتاب ہے جو قلبی برائیوں کی اصلاح کرکے تقویٰ کی حقیقی منزل سے روشناس کراتا ہے بشرط یہ کہ ہم اس کتاب کی ہدایت کو خلوص نیت سے سمجھیں اور تعلیمات پر عمل کریں، دنیا و آخرت کی بھلائیاں سمیٹنے کے لیے رہنمائی صرف قرآن سے ملتی ہے۔ ان خیالات کا اظہار انہوں نے زون جامعات ضلع شرقی میں ’’دعائے تکمیل قرآن‘‘ کی تقریب سے خطاب کرتے ہوئے کیا۔ دردانہ صدیقی نے کہا کہ قرآن میں جہاں دیگر قوموں پر انعامات و احسانات کا تذکرہ کیا ہے وہاں قوموں کی گمراہ کن روش کا ذکر کرتے ہوئے بچنے کی تنبیہ کی ہے۔ رمضان احتساب کا مہینہ ہے۔ جس میں تہہ دل سے اپنے نفس اور کردار کا محاسبہ کرنا ہو گا۔ اور انفرادی محاسبے کے ساتھ ساتھ بحیثیت قوم اجتماعی محاسبہ بھی کرنا ہوگا۔ اسی ماہ مقدس میں یوم بدر وہ عظیم الشان دن ہے جب کفار کی طاقت کا گھمنڈ خاک میں ملنے کے ساتھ اسلام کے نام لیواؤں کو ابدی غلبہ نصیب ہوا جس پر مسلمانوں کو آج تک فخر ہے۔ مگر اس عظیم فتح سے ہمیں سبق ملتا ہے کہ فتح و شکست کا تعلق ایمان، جذبے اور عزیمت سے ہے نہ کہ اسلحے اور فوج کی تعداد سے۔ اسلام کے نام پر حاصل کیا گیا وطن عزیز مختلف چیلنجز کا شکار ہے، پوری قوم کو متحد ہو کر ان چیلنجز کا مقابلہ کرنا ہوگا۔ اسلامی ریاست میں قوانین الٰہیہ کا نفاذ فرض ہے مگر اسلامی جمہوریہ پاکستان میں قرآنی حدود کی پاسداری نہیں کی جا رہی، لہٰذا اسلامی پاکستان خوشحال پاکستان کے لیے جدوجہد کرنا قرآن کی پکار ہے۔ دردانہ صدیقی نے کہا کہ آج مسلمان فلسطین، شام، مصر اور کشمیر سمیت دنیا بھر میں حق کی کامیابی و فتح کے لیے جانوں کا نذرانہ پیش کر رہے ہیں۔ ہمیں رمضان المبارک کے دعائیہ پروگرامات میں ان کی نصرت و فتح کے لیے خصوصی طور پر یاد رکھنا ہوگا۔ اپنی غلطیوں پر شرمساری اور خلوص دل سے استغفار کو اپنا شیوہ بنا لیں۔