July 21st, 2018 (1439ذو القعدة9)

دکھی انسانیت کی خدمت کا جذبہ قابل فخر ہے‘ دردانہ صدیقی

مرکزی جنرل سیکرٹری جماعت اسلامی حلقہ خواتین پاکستان دردانہ صدیقی نے کہا ہے کہ جماعت اسلامی نے دکھی انسانیت کی خدمت کا جو ذمہ اٹھایا ہے وہ قابل قدر ہی نہیں بلکہ قابل فخر بھی ہے،حکمرانوں نے وسائل کا غلط استعمال کرکے ملک اور قوم کو بیرونی قرضوں میں جکڑدیا ہے، جس ملک میں روزانہ 12 ارب کی کرپشن ہو ، وہ ملک کیسے ترقی کر سکتا ہے ، جماعت اسلامی آئندہ انتخابات میں ایم ایم اے کے پلیٹ فارم سے الیکشن میں حصہ لے گی ، عوام ملک اور قوم کی ترقی و خوشحالی کے لیے ایم ایم اے کو ووٹ دیں۔ ان خیالات کا اظہار انہوں نے جماعت اسلامی حلقہ خواتین کراچی کی جانب سے الخدمت کے تعاون سے ارکان آباد مسجد بن قاسم کورنگی ٹاؤن میں تقریب تقسیم راشن کے موقع پر خطاب کرتے ہوئے کیا ۔ اس موقع پر ناظمہ جماعت اسلامی صوبہ سندھ عطیہ نثار ، ناظمہ کراچی اسما سفیر ، مرکزی نائب قیمہ پاکستان فرحانہ اورنگزیب ، چیئر پرسن الخدمت شہناز اقبال ، نائب صدر الخدمت نویدہ انیس ، الخدمت کی بانی و نائب قیمہ پاکستان ناصرہ الیاس اور دیگر نے خطاب کیا ۔ تقسیم راشن کی تقریب میں اشیا خورو نوش پر مشتمل 1000 سے زائد راشن پیکٹ مستحق گھرانوں میں تقسیم کیے گئے ۔ دردانہ صدیقی نے کہا کہ جماعت اسلامی نے دکھی انسانیت کی خدمت کا جو ذمہ اٹھایا ہے وہ قابل قدر ہی نہیں بلکہ قابل فخر بھی ہے ، اللہ تعالیٰ ان لوگوں کو پسند کرتاہے جو اس کی مخلوق سے محبت و خیر خواہی کا رویہ رکھتے ہیں ، اللہ تعالیٰ نے انسان کو دنیا میں اپنا نائب بنا کر اس لیے بھیجا کہ وہ خدمت خلق کرتے ہوئے حقوق العباد اور انسانی خدمت کا فریضہ سر انجام دے ۔ انہوں نے مزید کہا کہ جماعت اسلامی حلقہ خواتین کراچی کی خدمات قابل قدر ہیں ،الخدمت رنگ و نسل ، علاقے اور برادری کے تعصب سے بالا تر ہو کر ایک مسلمان اور پاکستانی کی حیثیت سے معاشرے میں خدمت خلق کا کام کر رہی ہے ، الخدمت ملک بھر میں مستحق اور ضرورت مند طبقات کی فلاح و بہود کے لیے ملک کے کونے کونے میں ہونے والے کار خیر میں پیش پیش ہے ۔انہوں نے کہا کہ ملک میں روزانہ 12 ارب روپے کی کرپشن ہو رہی ہے ، ملک میں اگر اربوں روپے کی کرپشن نہیں ہو تو عوام کو زندگی کی بنیادی سہولتیں باآسانی مہیا ہوسکتی ہیں ، اسلامی فلاحی ریاست میں حکومت کا فرض ہوتا ہے کہ وہ ضرورت مندوں کو تمام سہولتیں مہیا کرے ۔ناصرہ الیاس نے کہا کہ الخدمت فاؤنڈیشن نے ہر موقع پر غریبوں کا خیال رکھا ہے ، الخدمت فاؤنڈیشن عوام کی خدمت کے لیے دن رات کوشاں ہے اور سماجی شعبوں میں شاندارخدمات انجام دے رہی ہے ، مخیر حضرات زکوٰۃ ، صدقات اور فطرانہ الخدمت کو دے کر کار خیر میں بڑھ چڑھ کر حصہ لیں اور اس کا حصہ بن جائیں ۔ شہناز اقبال نے کہا کہ الخدمت تعلیم ، صحت سمیت دیگر بنیادی ضروریات کے لیے ہنگامی اور مستقل بنیادوں پر کام کر رہی ہے ، الخدمت نے مصیبت کی ہر گھڑی میں دکھی انسانیت کی بلا امتیاز خدمت کی ہے ، ان شاء اللہ مخیر حضرات کے تعاون سے یہ سلسلہ اسی طرح جاری رہے گا ، مخیر حضرات کراچی کے پسماندہ خاندانوں کی فلاح و بہبود کے لیے آگے آئیں اور الخدمت کے ساتھ بھر پور تعاون کریں ۔ علاوہ ازیں دردانہ صدیقی نے جامعتہ المحصنات پاکستان کی نئی نگراں افشاں نوید کے تقرر کی تقریب سے خطاب کرتے ہوئے کہا کہ جامعتہ المحصنات پاکستان کا مشن تعلیم کے ذریعے تطہیر و تعمیر افکار، افراد کی تربیت و تنظیم، اصلاح معاشرہ اور اصلاح حکومت ہے ۔اسلامی وخوشحال پاکستان کے حصول میں جماعت اسلامی کے تمام اداروں کا کردار بہت اہم ہے۔ انہوں نے کہا کہ بحیثیت بندہ رب اقامت دین کی عظیم جدوجہد میں تحریک کے کارکنان ایک سرمایہ ہیں ،اقامت دین کی تحریک کا حصہ ہونا ہماری خوش نصیبی بھی ہے اعزاز اور آزمائش بھی۔ جماعت اسلامی جیسی اجتماعیت نفس کی نگہبانی کے لیے بہت معاون و مددگار ہے ۔انہوں نے مزید کہا کہ بیشک مناصب آزمائش ہیں لہٰذا نظام اور نظم و ضبط کے تحت اخلاص نیت کے ساتھ مناصب کی ذمے داریوں کے تقاضوں کو سمجھنا اور پورا کرنا ہی اصل امتحان ہے۔ دردانہ صدیقی نے افشاں نوید کے لیے استقامت اور ذمے داری کے بحسن و خوبی انجام دہی کے لیے نیک تمناؤں کا اظہار کیا اور دعا کی۔اس موقع پر ڈپٹی سیکرٹری جنرل آمنہ عثمان، ثمینہ سعید ، سیکرٹری تسنیم معظم ، ناظمہ صوبہ سندھ عطیہ نثار، ناظمہ کراچی اسما سفیر، نگراں شعبہ تعلیم طیبہ عاطف ، امت الرقیب، سابق نگراں جامعات المحصنات پاکستان مبین طاہرہ اور دیگر ذمے داران بھی موجود تھیں۔